Miracle Morning (Hal Elrod)
هاد واحد الكتاب ، بدل حياتي بزاف.
الخلاصة ديال هاد الكتاب كتكون أنك خاصك تفيق صباح بكري، ماتقولش ليا لا أنا ما نبغيش بكري ما نقدرش، ولا كنفيق غير بزز. كاع كنا هوكاك، نهار كتصوني الساعة كنبغي ناكول راسي بلفقسة ماحاملاش نفيق بكري. لمهم، صاحب هاد الكتاب علاش ختار الفياق بكري، كيبغي يقرى ولا يدير مواهب ديالو ولكن ملقاش لوقت، كال نديرها فليل ولكن اليل كايوصل الخدمة مسخسخ كيبغي غير يرتاح وأصلان ماكيبقا عندك دماغ لحتى حاجة ملي كترجع لدار. كال بلاتي نجرب وقية ديال الغدا ولكن ديك وقية ديال لغدا بغي غير ترتاح باش ترجع خدمة ثاني ولا قراية. إوا شوية كال نفيق بكري ولكن كال اواه انا نوض بكري باش نقرى و ندير سبور وووو.
إوا ناض نهار جرب فاق مع 5 ديال صباح قرى،كتب،فطر،دار سبور، وقال داز عندو نهار بيخير وكان نشيط حسن ملي كيزيد ديك ساعة ولا ساعتين ديال النعاس.
مهم خرج هاد الكاتب ب واحد قواعد لسماهم
S.A.V.E.R.S
ملي تفيق مع صباح من أفضل جوج سوايع قبل من الخدمة ولا القراية،اول حاجة ديرهة غسل سنانك وجهك وشرب كاس ديال لما، من تجربة ديالي هادو أفضل حوايج كيفيقوني. اه عنداكو واياكوم من السنوز زعما طفيو الساعة وتكول نزيد غير خمسة دقايق ونوض اه كيقولو you snooze you lose.
مهم ملي تشربو الما وحسيتو براسكم فقتو بداو
S: السكات Silence , كلس فشي بلاصة عزيزة عليك او اي بلاصة مرتاح فيها، متنعسش غير كلس. تصنت لعظامك ولا دير تأمل ولاصلي. والله واحد إحساس وهدوء وسكينة. كلشي ناعس وماكاين صداع كتحس بواحد الطاقة كدخلك .
ديرها 5حتى 10دقايق ولا كدما عجبك
A: affirmation, هدي كدير واحد التوكيدات بحوايج إيجابية أي حاجة بغيتيها. النجاح، الفلوس،
مثال كلس مع راسك وكول انا ناجح او ناجحة فحياتي انا قادر/قادرة نوصل الهدف ديالى....
هدشي غدي يعطيكوم واحد الثقة فنفسكم ويعاونكم باش توصلو لي بغيتو
V: visualization: كلس ثاني سد عينيك وتخيل راسك وصلتي داك الهدف لبغيتي عيشو عيش اللحظة شوف راسك راك ولا راكي نجحتي فقرايتك ولا وصلتي خدمة لبغيتي ولا شريتي طوموبيل لبغيتي ولا شريتي دار لكتمنى تخيل اي حاجة، إيجابية بغيتي توصلها فحياتك.
E: Exercising, سبور مااكولش ليا إوا صافي أنا مبوق بنعاس وندير سبور اسيدي ما قلتش ليك نود جري، قاد تجري علاش لا ماقادش تجبد حرك عظامك حرك يديك رجليك مهم غير تحرك
.انا تجريبتي بدت ب )stretching) تجباد وشوية قلبتها yoga مهم كيتشابهو ههه
R: Read, بنسبة ليا انا شكاندير ملي كنسالي من السبور كنمشي ندير شوية دلفطور قهوة شوية دزيت لعود مع خبز ولا بيضة ولا ليكان مهم غير تكون شيحاجة زوينة وصافي كنكلس نفطر ونقرى والله احسن وقية ديال قراية، جربت نقرا وسط النهار ولا ليل ديما كنسها ولا كنعس ملي بديت نقرا صباح وليت كنعيش مع الكتاب وما كتفوتني ولو كلمة.
مهم قراو اي حاجة كتعجبك مقال رواية شعر شي دراسة وا غير قراو
اخيرا
S: Scrib, دير دفتار ولا مدكرة كتب الحوايج لي نتا فخور بهم فحياتك الحوايج لممتن بهم
ولا كتب شطرا ليك لبارح ولا كتب شباغي تغير فحياتك ولا كتب كيفاش بغي توصل لأهداف ديالك وكيفاش غدي تحققهم ولا كتب شنو بغي دير فنهار.
انا شخصيا عزيز عليا نكتب شباغا نوصل الحوايج لي فرحانا بيهوم فحياتي واش باغا ندير فنهار.
راه واحد البنت حطات واحد البوست هنا كيفاش كتنظم وقتها ودايرا واحد دفتار كتبت فيه شنو بغات تدير فنهار/سيمانة/شهر.
انا دايرا شيحاجة بحال هوكاك كنظم فيه كولشي وكنكتب فيه داكشي لقلت ليكوم لفوق.
الى بغيتو تعرفو كتر قلبو على bullet journal اتعاونكوم بزاااف
وكاين واحد التطبيق كيعاوني حتى هو سميتو fabulous.
انا ماكتبتش هاد الشي حتى جربتو وطبقتو والحمد لله حسيت براسي وليت احسن و الخدمة وليت كنعطي فيها كثر وليت نشيطة
اه وكاينة واحد القضية ديك ديال انا مانقدش نفيق حيت ما كنعسش بكري. واخا مانعستيش بكري يمكن تفيق ويدوز نهارك بيخير، غير دماغك واش ولفتي ليه. ماتكلش وتبقى تحسب شحال ديال سوايع اتنعس. انا بعد مرات كنعس 4 ديال سوايع وكانوض مزيانة كنقول قبل ما نعس هاد 4ديال سوايع لغدي نعس ولا 3راه كافيني . مرا لولة ماتدقش ثانية ثالتة وصافي عقلك ايوالي يقول لجسم ديالك صافي داكشي لغتنعس راه كاافيك.
هادا ماكان بغين تعرفو كتر على شكاندير ولا على هاد الكتاب ولا اي سؤال انا رهن الإشارة وبتوفيق
Link English
Ha link dyal ktab French.
By Asmaa Ait
لا يوجد تعليقات
أضف تعليق