التقدم فالحياة بحال التنقية ديال لعدس.

العدس.. من أبنن الحوايج لي كيعجبوني و لكن ماشي هذا هو الموضوع.

بزاف دالمرات كنقيه ولكن هاد المرة بقيت كنخمم شحال و جاني بلي العدس من أحسن الأمثلة لتطوير الذات، دكشي علاش صورتو.

كيكون عامر بالحجيرات و خاصك تنقيه قبل ماطيبو ، كتخويه فشي سينية ولا طبسيل كبير باش تقدر تخدم فتيساع و على خاطرك.. كاتبدا تنقي بشوية بشوية، بلاصة فيها العدس مامنقيش، بلاصة فيها المنقي، و بلاصة فيها الحجيرات و دكشي لي زايد. واحد النظام خطير ! 

ايلا جينا نعكسو هادشي على حياتنا الشخصية و نختارو متلا بالخصوص الشخصية ديالنا. فباش تكون مؤهلة و تكون صالحة، خاصنا نحيدو العادات السيئة لي فينا و لكن حاجة بحاجة و شوية بشوية و بنظام.. و مزيان نخليو دوك الحجيرات فالجنب نشوفوهم مرة مرة، باش يبان ليا التطور اللي كنديروه ، كنسميوه الانجاز ؛ كلما حسيتي براسك درتي انجاز ، شفتي شحال نقيتي، شحال جمعتي دالحجر و شحال باقي ليك و السينية كاملة قدام عينيك. كلما حاولتي تنقي كتر باش تكمل .. 

ممكن نعكسو هاد اللعيبة دالعدس على بزاف دالحوايج فحياتنا بحال الاهداف ديال كل واحد فينا و لا الدروس و الموديلات فالقراية .. سمحو ليا طولت ، ماتبخلوش عليا بشي متال حتا نتوما . السلام وعليكم . 

By @Soundouss bouhandi